El sogno (1984)

				
				revival degli anni ’40



Narratore 1 	Soto l’onbrìa de na gran gazia
		Gigeto se perde via.
		Par cussin ’l à na fassina
		e par coverta a so jachetina.
		El dorme da pì de na bona ora
		parché adess i omeni
		i va pì tardi fora.
		Gigeto dorme e el sogna.
		El sogna de essar
		el moroso dea Ceestina Montagnera.

Narratore 2 	A sera va zo te un mar de fogo
		e lu caminando drìo el trodo el va…
		El va daea so Celestina.
		Pena la vede
		ferma, soa stradeeta
		co i oci fissi e che lo speta,
		el pass se fa sicuro e pì spedìo,
		el cuor ghe bate cussì forte
		che’l par scaturìo...

Gigeto		Bonasera...
Ceestina	Bonasera, Gigeto...
Gigeto		Come vaea?
Ceestina	Benon mi, e ti, Gigeto?
Gigeto		A mancopedo...
Ceestina	Tasi tasi, no fa gnanca fredo
Gigeto		Fredo? Ho un caldo indoss mi...
Ceestina	Se vede sì, te si ross inaeà,
		situ sudà?
Gigeto		Un fià...
Ceestina	Dame qua quea man, fame sentir... 
		ma no sta ’ndar lontan!
Gigeto		Son sudà, sì, un fià...

Narratore	Lu la varda par de soto,
		quasi in scondion,
		po’ al’inproviso
		el ghe dà un remenon,
		el se s-ciara a goea seca.
		Maedeta goea che a é senpre seca!

Gigeto		Cossa dìsei to pare, to mare?
Ceestina	I é contenti che mete su fameja.
Gigeto		Par forza, i é do ani boni...
		no te lassarò mia voear
		cofà na paveja.
		So, satu, mi
		cossa vol  dir metar su fameja...
Ceestina	Caro el me bel!
		Caro el me sbarbatel!
Gigeto		Urce, va in là, no stame tocar
		e recordete che ho fat el soldà
		nell’arma dea fanteria!
		Ghe vorìa ancora quea
		che no savesse
		cossa vol dir portar e braghesse!
Ceestina	Ma Gigeto, no state rabiar
		par carità, cossa atu stasera
		te si cussì insustà…
Gigeto		Anca mi ò i me fastidi
		paea testa…
Ceestina	Varda Gigeto che zesta de radicèe
		e ò ciolte su quee tirèe là
Gigeto		No stame mincionar…
Ceestina	Ma vàrdeme Gigeto
		mi parle cussì
		ma no par farte dispeto,
		te sa che son un carneval…
Gigeto		Sì, sì, un fià ben e un fià mal,
		ma vàrdeme, vàrdeme qua
		tea crosera dei oci.
Ceestina	Adess no stame criar
		me trema za i zenoci... (si allontana)
Gigeto		Ceestina, torna indrìo
		no t’à ancora finìo de matidar
		e pensar che te te vol anca sposar!
		Vien qua t’ò dit...
Ceestina	Caro el me ben, caro el me afeto!

Narratore 1 	Gigeto la ciapa co tanta passion
		che ea ’a se sente de ver vizzin un on.
		Intan a pensa:
		“Se ’l é cussì bel da moroso
		cossa saraeo co’l sarà vestìo
		da sposo”.
Narratore 2	Ma ea tra i so brazi streti
		de zerto adess
		no a fa pì dispeti,
		ferma imatonìa
		a se tien tut drento,
		tant a sa che’l so ben
		’l é tut el so sentimento.

Gigeto		Varén a camera de sora.
		Se a fa saltar fora dal graner
		quatro par quatro
		porta e balcon.
		El let lo fa Toto Sbacheton.
Ceestina	Anca el comò, no é vero, Gigeto?
Gigeto		Sì, sì.
Ceestina	Mi ò za el coprileto 
		un fià de tende
		e un tapeo par tera.
Gigeto		El nono l’à dit
		che se tut va ben
		se sposaren dopo e panoce.
Ceestina	Chissà che noze!
		Satu che a fia dea Nesta
		me impresta el so vestito bianco!
Gigeto		Benon, ciò! (allunga le mani)
Ceestina	Caro mio, prega el to Dio!…
		De bianco me spose mi
		e coe canpane che sona!
		E no de sera cofà a pora Tonia.
Gigeto		Sì, sì, ti de bianco e mi de scuro
		e coe scarpe nove.
Ceestina	Chissà che quea matina no piove!
Gigeto		El pasto sarà in agenzia 
		o a casa mia.
Ceestina	Se sarà pì de zentozinquanta!
		Ho invità anca Pino
		quel che canta.
Gigeto		Vegnarà anca Cici
		coa smonicheta a boca…

Narratore	Gigeto dolzemente la toca.
		Po’, no so par qual magìa
		nel sol che sparisse via,
		el vede a so Ceestina
		vestia da sposa.
		In alt na stea
		vien fora luminosa. 



					San Donà di Piave, 10.09.84

Torna alla pagina iniziale di LISA