Elvira Tronchin (1921-200..)

Quando te situ sposada?
Me son sposada nel 1944, el 24 Giugno. El 25 compìa i ani to nono. (Il nonno è Angelo Venturato 1917-1992)

Che lavori atu fat in giro?
Un lavoro! Son stata in servizio dai signori; el primo, tredese ani da un dentista a Venezia al ponte dele Gulie. No ’l é tanto distante daa stazion, vizin el Cinema Italia... Soto servizio fee sempre iutante de ’a gente che vegnea dentro, ghe cioée el paltò, ghe ’o mettee so l’attaccapani, i fee passar sol studio dentistico e ciapee anca tante mance. E dopo, quando gavea finio tuto, quanto el laboratorio dei clienti, allora avee da lavar. Tutto quanto meter apposto...

Atu fat altri lavori?
Dopo son stata in servizio a Ravenna. Là son stata... altri do ani.

Vegnevitu anca casa qualche volta?
Altro che vegnee casa! In treno vegnee casa. In tee feste pì grande; e se me mama ’a stea poco ben vegnee casa!

Cossa feitu a Ravenna?
A Ravenna fee pulizia, mangiare... Un poco de tuto. No iera tosatei! Te servia i adulti, e i veci anca. El iera un apartamento grande. Da signori! A venezia gavee tredese ani e dopo a Ravenna gavee disette ani.

Conosseitu zà el nono?
El nono ’o conosee de quatordese ani. Se se scrivea qualche lettera. Quando che ’l andéa casa in licenza cerchee de ’ndar casa anca mi e là se se trovea. ’L é sempre stato! ’L é sempre stato! Diese ani. Lu ’l à dita che el me ha scrito quatrozento lettere in diese ani. Lu el me scrivea sempre do volte a settimana e inveze mi no ghe scrivee spesso. Dee cartoine e de tuto.

Che fine gae fato chee lettere là?
Eee!! Sì! Sì! El gavea un paco cussi, che dopo le gà brusae.

Quaeo xeo el to ricordo pì bel de ’a to vita?
El me ricordo pì bel de ’a me vita no savarìe dirte. Certo: che me son sposada! Ghe ho sempre voiuo ben a to nono. E dopo... de ’a me vita! Iere in fameia in trentatre persone co me gò sposada. E ora te pol pensarte, in trentatre persone el me gà menà qua to nono. Da Fossalta son vegnua qua. El pi bel giorno de a me vita!! L’é che gò sposà to nono e ghe gò sempre vossuo ben. Queo é tuto. E dopo!! Durante i ani de ’a me giovinessa sempre alti e bassi. Se iera in fameia in tanti! Sacrifici tanti! Lavorar tanto, perché da zovane son sempre stada in servizio.

Situ ’ndata da altre parti oltre quei posti là?
No, ’l é soltanto quei posti là! Son stada anca in Piemonte. Sì! El ultimo servizio el iera in Piemonte. Là son stata par zinque ani e dopo ’l é morto me mama e no son pi ’ndata. Là gavee disdoto ani. Sempre in servizio! Dai signori. Son ’ndata a... cosso! Aaaa! Dio bon!... Mmm!... Desso no me ricordo pì! Un paesotto grando... Mmm!...Novara! Novara! E dopo là i vea anca na bea villa a Strevi, sempre aparte del Piamonte. Quando i ’ndea a far ’e ferie, (a)eora ’ndee anca mi. ’A iera na bea paeazzina in campagna che i ’ndea far ’e ferie. E dopo gò cambià posto! Satu par cossa? I me dea poco da magnar e ora gò cambià. E dopo lori i me ha fato un biliettino, che ho fato na bona condotta e ho trovà ’n altro posto. Quando te ’ndea via dai paroni... i vea da farme un biliettino de bona condotta, che te catesse ’n altro posto. Lo gò ancora el bilietto! Te ’o fae veder. (Ripete le parole rivolte alla vecchia padrona) «Signora mi no me sinto pi de star quà». Chea signora ’a me dea poco da magnar. Ea à me ha dito: «Me despiace che vai via, perché ti ho sempre dato tanta fiducia! Bene! Come una figlia».

Aveitu anca tempo libero?
Quando che ’ndee fora in uscita ’a domenega ’vee me amighe e se ’ndea al patronato dee suore. (Solamente el) Parmeso dee amighe, no se ’ndea ai divertimenti, se ’ndea al patronato dee suore... e là se se riunia e se... Gò vuo tanti corteggiatori e queo se ’o sa... Mi a me signora ghe contee tuto... E anca Angeo ghe scrivea a me signora e anca el ghe mandea qualche bea cartoina, a Pasqua... Lu no li conosea, ma mi confidandome co ’a me signora, che gò el fidanzato, dove che el iera... El gà fato la guera de ’a Grecia, ancora del 1939. E dopo ’l é stà mal, e ’l ha fato infezion intestinae co na scatoeta de carne guasta e i ’o ha rimpatrià e ’l é stato ricoverà a Firenze. Qua (a Firenze) ’l é stato tre mesi dentro e sinò i ’o mandea in Russia... ’L é stato fortunà!

Dove situ nata?
Mi son nata a Godega di Sant’Urbano. Prima de vegner Fossalta son stata a Santa Lucia. La scuoea la ho fata a Santa Lucia fino a la quarta elementare... e dopo son stata casa. Son vegnua Fossalta che gavee tredese ani. (Trapela un ricordo riguardante le domande precedenti) E satu par cossa ho smesso el servizio là... a Venezia? Perché no me conferia ’e arie (=l’aria non mi faceva bene). No iere bona de magnar e ora me mama a me gà fato ’ndar casa. A me ha portada dal dotor e (al)ora lu el me gà dito...

Me ricorde che to nono ’l è stato sol campo de concentramento... To nono ’l é stato (v)ia tel campo de concentramento In tel ’39 le ’ndato in Albania, dopo ’l é tornà casa e dopo i lo ha trasferio a Bolzano. ’L é stato tre ani a Bolzano in servizio e dopo ’i lo ha fato presoniero dai tedeschi. El gavea anca ’a fotografia in te l’armadieto de’a Marianna. I tedeschi nek nek, nek. La fotografia l’é stata pubblicaa in te’a ciesa, de sta tosa, che no i voea che ste tose ’e fesse amor co i italiani. L’é stata disonoraa, l’é stata svergognada. Dopo sta tosa no l’à pì vista. E t’à visto che ’l à voesto ndar in serca. To nono ’l é stato presoniero do mesi, tre. Dopo i lo ha trasferio qua a Verona che son ndata catarlo anca mi. Son ndata! Che el iera vestio co na giacca tedesca. Te sa quando el xe prisoniero... ! Son ndata cattarlo mi co Martin, che el sarie el pi vecio dei fradei. A Verona ’l é stato sette mesi, otto.

Ma ’l à viaià tanto me nono?
’L é nato (andato) in te tanti posti. E dopo a Sommacampagna (provincia di Verona) ’l à fatto servizio. A Torino ’l é ndato, quando ’l é n’dato soto miitar dei voeontari. Là l’à fato sie mesi de studio. Quando ’l à finio ’a guera, là smesso de n’dar in giro e le vegnuo casa. El se gà congedà. ’L à fato servizio anca a Venezia, me par ai Albaroni (Lido degli Alberoni).

Cossa eo sucesso chea volta dell’alluvion?
L’alluvion? Che to papà el iera a Roma. El iera a... a... Cossol!... Che dopo ’l é vegnuo casa.

Quanti giorni ea stata qua l’acqua?
L’é stata 40 giorni l’acqua. Quanto fango!! Quanto fango!! Quanto fangol! Ghe iera i barconi che vegnea qua par portarne e... .. Invese l’elicottero portea da magnar. Tre volte ’l é vegnuo. (A)e vacche che iera in staea ghe gaven messo tante fassine pa alzarle, che te potesse monzarle. Dopo che é vegnuo ’a comission par veder «Insomma sta casa la é innabitabie e no poé star dentro» parla uno de ’a commissione per l’abitabilità delle case soggette a l’alluvione. E dopo pian, pian ven costruio ’a casa nova.

Ma ’e case de ’a zona, qua dei Venturati, iere zà fate?
Là iera zà fata a casa de to zio Meno.

A casa dove sta Mario, dove sta Tarcisio?
Lori i stea là dove xe Merigo. A prima casa che i ha fato qua l’é stata quea de to zio Meno, e dopo a nostra ’i ha fato quea de Mario. Nel ’68 l’avemo fata noialtri e un ano prima l’à fatta to zio sante.

Dove steo prima me zio Sante?
In te’a casetta picoea che ghe xe là. Te ciapea el svolto de’a strada e te ciapea un stradon. Ghe iera anca dee vide e te rivea in fondo da to zio sante. Quel el iera el stradon che te ’ndea. El stradon da campi.

Cossa ghe iera da Favotto (Beppi Favotto)? L’é sempre stata chea casa?
Sì! L’é §empre stata. E anca i cancei se dovea serar co se ndea fora. Quel là el iera el nostro stradon e dopo i ha fato sta qua (la stradina attuale).

Ho sentio che tanti, pa l’alluvion, i ndea via?
Tanti che no podea star là par l’alluvion i li portea via co i carrarmati, i anfibi. ’I é stati (a) Jesoeo, ’i é stati tanto finemente che l’acqua no ’a xe tornada zò.

Ma chi eo che ve ha avvertio de l’arrivo de l’acqua?
Prima se sentia ’e sirene pa avertimento.
E che ora iera... ’E sie iera.

’A é rivaa subito l’acqua?
Eeeee!!! Madonna !! Te ’a vedea vegner oltra, traversar ’a canaetta. Se te vede come che ’a traversea. Qua ghe iera a caneva. Qua da basso, sotto el portego, s’avea nà caponera de pitussi boni ormai da copar. Tutti bianchi. I iera na quindisina. L’acqua li ha negai tutti. El vin in cantina! ... Le damigiane ’e gà tute spaccà(e). E tine no! Sen stati attenti che ’a vegnea vanti. ’A vegnea vanti! Se iera ancora in leto. ’A xe capitaa de mattina, ’a xe! A Zenson s’ha roto i argini. E dopo te vedea tutti sti porzei, ste bestie morte. Al momento che ’a xe vegnua basso, la iera sempre corente finemente che ’a te gà impinio.
Alta, alta, alta l’é stata poco pì de vinti giorni. E dopo pian pian te vedea che ’a caéa, che ’a caéa, che ’a caéa.

E chea volta de ’a diga de Longarone?
Cò tutti chei morti! El Piave vegnea Basso. Vegnea basso anca l’anema!

E quando xe vegnua a guerra qua?
So a seconda guerra mondiae! Chea volta i gà bombardà Treviso. Ogni sera ’i passéa (gli aerei). E ora là, tanti ’i iera in staea che i varnea ’e vache co un ciaretto. Quando te ’o sentia, e ora te tochea stuarlo e star fermo, perche se no, dove i vedea ciaro i bonbardava. ’I ha bombardà in tante parti. Qua se stea! Anca so ’a strada là, dove che l’é i Mariuzi. Da Bativa! Là ’i gà butà na bomba, ’i gà! Eeeee!! Che rassa de pàca i gà dato! ’I ha fato na busa... Maria vergine. Morti, no. Sa vea paura che i ne bombardesse ’a casa e ora se corea. Quando i sonea ’a sirena e ora te tochea!

Chea volta de ’a liberasion, i americani ei passai anca par qua?
I americani i xe vegnui anca qua in casa, che ’e tose... (’e jera tute mate). Se iera tante tose! No i ha fato niente. ’I ha visto (hanno solo guardato)

Quanto la gà durà stà roba de scòndarse dentro i fossi, de stuar e luci... ?
Eeeee! La gà durà! Perché i la gà finia in tel quarantasinque.

Quando eo che ve sé trasferii, da qua a Mieperteghe?
Me ricordo! Perché to zio Renzo ’l é nato là a Mieperteghe, nel ’48, dopo ’a guerra. Qua no se podea viver co na campagnoea de dissette (17) campi, in 33 persone. E ora semo ’ndati a Mieperteghe.
Qua ven dato in affitto ai Gabriei. Semo stati quattro ani là a Mieperteghe e dopo se ven diviso. E (a)lora tre fradei ’i é restai là e tre xe vegnui qua: Meno, Santo e Angeo.

I campi qua, chea volta, no i era tutti dei Venturato?
’I era de Favotto e de tutti i Venturati qua. El nonno de to nonno, disette campi i iera sui.

De el campo cossa coltivassi?
Soturco, formento. Se iera propetari, no se iera mia mezzadri, qua. Vide e... bastanza! Se fea bastanza ua. Se vea ’e vacche in staea. Quando ’e fea i vedei! E quando li fea, co chei schei là se paghea ’e tasse. E tasse de ’a tera! E tasse come adesso che se paga.

Par bevar cossa bevessi?
L’acqua ’a iera quea del posso. ’A iera neta. E tante volte se metea dentro a carne co na zesta. Su da l’acqua! E se mantegnea fresco. A carne ’a durea un giorno, do giorni. Par de no, ma el pozzo fa fresco.

E chea volta che ’i a bombardà Treviso, cossa ’ai fatto?
Eee...!!! Che rassa de aparecchi!!! Te sentia che ’i passea pieni de bombe. ’I passea sora qua. Te ’i sentia che ’i passea e ’i passea. Pieni de bombe! ’I n’dava via pian pianin. ’I é passai par qua. Che flotte che ghe iera! E dopo t’ha sentio un bombardamento, t’ha sentio. Iera anca mattina co ’i ha bombardà. ’I ha fato tanti morti! Se savea ormai dove ’i ’ndea.

E chea volta del teremoto? (del Friuli, 1976)
El me parea un camion, el me parea! E se te vedea ’e gaine come che ’e vegnea fora del puner, sigando, Maria vergine!!! E Renzo el iera che el tirea su acqua dal posso. E se sentia come un giramento de testa. Maria vergine! ! ! A ringhiera che tremea, ciò! E quando iera undese boti xe stata ’n altra scossa. Che mi iere in tel orto. Se iera tutti su, se ieri (durante la prima scossa). Iera caldo, iera, che mi iere in tel orto. E dopo Beppi el ne gà ciamà tutti là. E se iera tuti rifugiai perché ghe iera pericoeo. E dopo l’è vegnuo scosse pì leggere. Là pì granda che l’è vegnua l’é vegnua ae undese de mezzogiomo.